امریکہ میں ایک دن میں 1423اموات ، پوری دنیا میں اموات 59 ہزارسے زیادہ

پوری دنیا میں کورونا وائرس کا قہر خوفناک شکل اختیار کرتا جا رہا ہے ۔ دنیا کے طاقتور ترین اور سب سے ترقی یافتہ ملک امریکہ میں کل ایک دن میں سب سے زیادہ اموات رپورٹ ہوئی ہیں۔ امریکہ میں کل جمعہ کو 1423 افراد ہلاک ہوئے ہیں اور وہاں متاثرین کی کل تعداد دو لاکھ 77 ہزار ہو گئی ہے جبکہ اموات کی تعدد سات ہزار سے تجاوز کر گئی ہے۔امریکہ میں جیسے جیسے کورونا کا قہر بڑھ رہا ہے ویسے ویسے امریکی عوام کا غصہ امریکی صدر ڈونالڈ ٹرمپ کے خلاف بڑھ رہا ہے۔

اٹلی ،اسپین ، فرانس اور برطانیہ میں متاثرین اور اموات کی تعداد میں بہت تیزی کے ساتھ اضافہ ہو رہا ہے ۔اٹلی میں متاثرین کی تعداد ایک لاکھ 19 ہزار سے زیادہ ہے جبکہ اموات کی تعداد 14 ہزار سے زیادہ ہے۔ اسپین میں بھی متاثرین کی تعداد ایک لاکھ 19 ہزار سے زیادہ ہے اور وہاں اموات گیارہ ہزار سے زیادہ ہے۔ فرانس میں متاثرین کی تعداد 64 ہزار سے زیادہ ہے اور اموات کی تعداد 6 ہزار سے زیادہ ہے۔ برظانیہ میں متاثرین کی تعداد 38 ہزار سے زیادہ ہے جبکہ اموات کی تعداد 3 ہزار سے اوپر ہے۔

یوروپ کا جرمنی ایسا ملک ہے جہاں متاثرین کی تعداد تو کافی زیادہ ہے لیکن اس کے مقابلے اموات کی شرح کم ہے۔ جرمن میں متاثرین کی تعداد 91 ہزار سے زیادہ ہے لیکن ہلاکتوں کی تعداد ابھی 1275 ہے۔ ایران میں134مزید افراد کی ہلاکتوں کے بعد وہاں مرنے والوں کی تعداد 3294 ہو گئی ہے۔ہندوستان میں متاثرین کی تعداد میں اضافہ کا رجحان جاری ہے اوریہ تعداد دو ہزار سے پار ہو گئی ہے اور مرنے والوں کی تعداد 50 سے تجاوز کر گئی ہے۔

ادھر ابھی تک پوری دنیا میں لگ بھگ دو لاکھ 88 ہزار افراد صحت یاب ہوچکے ہیں جن میں چین کے 76 ہزار سے زیادہ شہری شامل ہیں۔