کیا ڈاکٹر کورونا مریضوں کا غلط طریقے سے علاج کر رہے ہیں؟

کورونا کے مریضوں کا علاج کرنے والے ڈاکٹروں کو روز بروز نئے تجربات ہو رہے ہیں اور یہ پتا چل رہا ہے کہ اس مہلک وائرس کے شکار مریضوں کے اہم جسمانی اعضاء ناکارہ ہو جاتے ہیں۔

تصویر سوشل میڈیا
تصویر سوشل میڈیا
user

قومی آوازبیورو

طبّی ماہرین نے نئی تحقیق کے بعد انکشاف کیا ہے کہ کورونا وائرس صرف نظام تنفس کی بیماری نہیں ہے بلکہ یہ خون کی شریانوں کی بھی بیماری ہے۔ اس نئی تحقیق سے اس امر کی وضاحت میں مدد مل سکتی ہے کہ کووِڈ-19 کے مریضوں کو دل کے دورے کا کیوں سامنا ہو رہا ہے، خون کے لوتھڑے کیوں جمع ہو رہے ہیں اور اس طرح کی دوسری علامات کیوں ظاہر ہو رہی ہیں۔ اس سے یہ بھی ظاہر ہوتا ہے کہ اس وقت کورونا کی بیماری کا غلط طریقے سے علاج کیا جا رہا ہے۔

نئے کورونا وائرس سے لاحق ہونے والی بیماری کووِڈ-19 کو اب تک نظام تنفس کی بیماری ہی قرار دیا جاتا رہا ہے کیونکہ اس سے بنیادی طور پر پھپیھڑے متاثر ہوتے ہیں اور اس کا شکار شخص بالکل اسی طرح موت کے مُنھ میں چلا جاتا ہے جس طرح نمونیا کا مریض دم توڑ دیتا ہے۔


کورونا کے مریضوں کا علاج کرنے والے ڈاکٹروں کو روز بروز نئے تجربات ہو رہے ہیں اور یہ پتا چل رہا ہے کہ اس مہلک وائرس کے شکار مریضوں کے اہم جسمانی اعضاء ناکارہ ہو جاتے ہیں۔ ان میں دل، دماغ اور گردے شامل ہیں۔ اب ڈاکٹروں کا نئے شواہد کی بنا پر یہ کہنا ہے کہ کورونا وائرس اب شریانوں کو متاثر کرنے والی بیماری بھی ہے اوراس کی علامات بڑھتی جا رہی ہیں۔

ایک محقق ماہر ڈاکٹر ولیم لی کا کہنا ہے کہ ''کووِڈ سے متعلق یہ تمام پیچیدگیاں ایک سربستہ راز تھیں۔ ہم نے خون کے لوتھڑے دیکھے ہیں، گردوں کو نقصان ملاحظہ کیا ہے۔ قلب میں حرارت مشاہدہ کی ہے، مریضوں کو دل کا دورہ پڑتے دیکھا ہے اور دماغ میں سوجن بھی دیکھی ہے۔''


ڈاکٹر لی نے ایک انٹرویو میں کہا کہ ''کورونا کی بظاہر غیر مربوط مظہریت نظر آتی ہے اور یہ سارس، ایچ1 این1 اور دوسرے وبائی امراض میں نہیں دیکھی گئی تھی۔'' ڈاکٹر لی آنجیو جینسیس فاؤنڈیشن کے صدر ہیں۔ ان کی یہ غیر سرکاری تنظیم مرض کے خلاف منفرد طریقے سے نبرد آزما ہوتی ہے اور یہ نئی خونی شریانوں کی تیاری کے ذریعے علاج کرتی ہے۔

بریگھم اینڈ ویمن اسپتال کے شعبہ امراض قلب اور ویسکولر کے میڈیکل ڈائریکٹر ڈاکٹر مندیپ مہرا کا کہنا ہے کہ مذکورہ بیان کردہ علامات سے ظاہر ہوتا ہے کہ یہ وائرس ممکنہ طور پر ایک ویسکولر ٹراپک وائرس ہے۔ اس کا مطلب یہ ہے کہ یہ خون کی شریانوں پر اثر انداز ہوتا ہے۔


انھوں نے میگزین میڈیم کو بتایا کہ ''اب یہ تصور ابھر رہا ہے کہ یہ صرف نظام تنفس کی بیماری نہیں بلکہ اس کا آغاز تو نظام تنفس ہی سے ہوتا ہے مگر یہ شریانوں کی بیماری ہے اور اس کی وجہ سے ہی متاثرہ لوگوں کی ہلاکت کا موجب بنتی ہے۔ اگر کووِڈ-19 شریانوں کو متاثر کرتی ہے تو اس سے اس امر کی بھی وضاحت ہوجاتی ہے کہ پہلے سے ذیابطیس ، بلند فشار خون اور دل کی بیماریوں میں مبتلا مریض کیوں اس وائرس کا زیادہ تعداد میں شکار ہو رہے ہیں۔

اگرنئی تحقیقات کی روشنی میں کورونا وائرس کی از سرنو درجہ بندی کی جاتی ہے تو پھر سائنس کمیونٹی کی اس بیماری کے بارے میں حکمت عملی میں بھی تبدیلی رونما ہوگی اور اس سے اس کے علاج کی نئی راہیں تلاش کرنے میں مدد ملے گی۔


ڈاکٹر لی نے حال ہی میں دوسرے مصنفین کے ساتھ ایک تحقیقی مطالعاتی رپورٹ قلم بند کی ہے۔ اس میں وہ لکھتے ہیں کہ کووِڈ-19 کے بہت سے مریضوں کے پھیپھڑوں میں خون کے لوتھڑے پائے گئے ہیں۔پھیپھڑوں کے ساتھ خون کی شریانیں جسم کے باقی حصوں کو آکسیجن مہیا کرنے کے لیے ضروری ہیں۔ وہ جب متاثر ہوتی ہیں تو پھر جسم کو آکسیجن نہیں پہنچ پاتی اور وہ اس سے متاثر ہوجاتا ہے۔

(العربیہ ڈاٹ نیٹ)

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔