ایران میں کورونا وائرس کے 25 نئے معاملے، نائب صدر بھی زد میں

تہران: ایران میں جمعہ کی صبح تک کورونا وائرس سے متاثر 270 مریضوں میں سے 26 کی موت ہو گئی جبکہ ایک نائب صدر بھی کورونا وائرس کی زد میں آ گئی ہیں۔ ملک میں پہلی بار نماز جمعہ کے اجتماعات کو منسوخ کرنا پڑا۔ حکومت سے ملنے والے اشارون کے مطابق آئندہ دنوں میں ایک سے زیادہ مذہبی مقامات کو بھی غیر معینہ مدت کے لیے بند رکھا جاسکتا ہے۔

ایرانی میڈیا کے مطابق ایران کے 12 نائب صدور میں سے ایک کو 27 فروری کی شب کورونا وائرس نے اپنی زد میں لیا۔ خواتین اور خاندانی امور کی نائب صدر معصومہ ابتکار (59) کورونا وائرس میں مبتلا ہیں۔ انہیں وضع کردہ عالمی معیارات کے مطابق علاج کے لیےقرنطینہ میں ڈال دیا گیا ہے۔

کرونا وائرس کے مریضوں کی تعداد کے حوالے سے بظاہر ایران چوتھے نمبر پر ہے لیکن ماہرین کا کہنا ہے کہ یہاں لوگوں پر بڑی تیزی سے یہ وائرس حملہ آور ہے۔ دنیا بھر میں کورونا وائرس کے مریضوں کی تعداد آج بڑھ کر بڑھ کر 83 ہزار 389 ہوگئی ہے جس میں مسلسل اضافے کا اندیشہ بدستور برقرار ہے۔

ابھی پچھلے 24 گھنٹوں کے دوران بھی دنیا بھر میں مزید ایک ہزار لوگ اس وائرس سے متاثر ہوئے ہیں اور ایران میں 25 نئے کیسز منظر عام پر آئے ہیں۔ چین میں اس دوران سات لوگوں کی موت ہوئی ہے۔ حکومت نے حفظ ما تقدم کے تحت قدم اٹھاتے ہوئے تعلیمی اداروں سمیت ثقافتی اداروں کو بھی غیر معینہ مدت کے لئے بند کردیا ہے۔