ہندوستانی ٹیم میں روہت شرما کی واپسی، آسٹریلیا کے لیے خطرہ بڑھا

میلبورن: ہندوستانی کرکٹ کنٹرول بورڈ (بی سی سی آئی) نے پوری طرح فٹ ہوئے اوپنر بلے باز روہت شرما کو آسٹریلیا کے خلاف سڈنی میں سات جنوری سے ہونے والے تیسرے ٹسٹ کے لئے ہندوستانی ٹیم میں شامل کرنے کے ساتھ ساتھ انہیں نائب کپتانی کی ذمہ داری بھی سونپی ہے۔

بی سی سی آئی نے جمعہ کو بیان جاری کرکے روہت کو نہ صرف ٹیم میں شامل کرنے کا اعلان کیا بلکہ انہیں پہلی بار ٹسٹ ٹیم کی نائب کپتانی بھی سونپ دی۔ روہت کو نائب کپتانی سونپے جانے کا واضح مطلب انہیں سڈنی میں تیسرے ٹسٹ میں اوپننگ کے لئے اتارا جائے گا اور اب تک دو ٹسٹ کی چار اننگز میں ناکام رہے اوپنر مینک اگروال کو الیون سے باہر جانا ہوگا۔

باقاعدہ کپتان وراٹ کوہلی جنوری میں اپنے پہلے بچے کی ولادت کے سبب دسمبر میں ایڈیلیڈ میں پہلا ٹسٹ کھیلنے کے بعد ملک واپس آگئے تھے۔ سیریز کے باقی کے تین ٹسٹ میچوں میں اجنکیا رہانے ہندوستان کی کپتانی سنبھال رہے ہیں۔ رہانے کی کپتانی میں ہندوستان نے دوسرا باکسنگ ڈے ٹسٹ جیت کر سیریز میں 1-1 سے برابری حاصل کرلی ہے۔

واضح رہے کہ روہت آئی پی ایل کے آخری دور میں زخمی ہوگئے تھے لیکن آخری لیگ میچ میں انہوں نے اپنی ٹیم میں واپسی کی تھی اور پھر پلے آف اور فائنل میں اپنی ٹیم ممبئی انڈینس کو جیت دلاکر پانچویں بار چمپئن بنایا تھا۔ آئی پی ایل ختم ہونے سے قبل آسٹریلیا دورے کے لئے ہندوستانی ٹیم کا اعلان کیا گیا تھا جس میں تینوں فارمیٹ میں روہت کو شامل نہیں کیا گیا تھا۔ لیکن روہت کے آئی پی ایل کے آخر میں کھیلنے کے بعد ان کی فٹنیس اور ٹیم سے باہر کئے جانے کے سلسلے میں کئی سوال اٹھے تھے۔

بی سی سی آئی کے صدر سوربھ گنگولی نے واضح کیا تھا کہ روہت 70فیصد ہی فٹ ہیں۔ بورڈ نے ہندوستانی ٹیم کے یو اے ای سے آسٹریلیا روانہ ہونے کے بعد ایک بیان جاری کرکے واضح کیا تھا کہ روہت اپنے والد کی طبیعت خراب ہونے کے سبب یو اے ای سے ممبئی واپس آئے تھے۔

روہت ممبئی سے پھر بنگلور واقع این سی اے پہنچے تھے اور انہوں نے ریہیبلی ٹیشن میں اپنا وقت گزارا۔ روہت کا 11 دسمبر کو این سی اے میں فٹنس ٹسٹ ہوا جس میں وہ پاس ہوگئے۔ روہت کو اس کے بعد آسٹریلیا جانے کے لئےمنظوری دے دی گئی۔ آسٹریلیا پہنچنے کے بعد روہت کو 14 دن کوارنٹین میں رہنا پڑا۔ اپنا کوارنٹین پیریڈ پورا کرنے کے بعد روہت میلبورن میں ہندوستانی ٹیم میں اپنے ساتھ کھلاڑیوں کے ساتھ جڑ گئے ہیں اور انہوں نے پریکٹس بھی شروع کردی ہے۔

میلبورن ٹسٹ میں جیتنے کے بعد کپتان رہانے نے کہا تھاکہ ان کی روہت کے ساتھ بات چیت ہوئی ہے اور ٹیم کو ان کی واپسی کا بے صبری سے انتظار ہے جبکہ کوچ روی شاستری نے کہا تھاکہ وہ ایک بار روہت سے بات کریں گے کہ وہ میچ میں اترنے کےلئے جسمانی طور پر پوری طرح فٹ ہیں یا نہیں۔

دوسرے ٹسٹ میں شامل کئے گئے نوجواناوپنر شبھمن گل نے میلبورن کی دونوں اننگز میں شاندار بلے بازی کرتے ہوئے 45 اور ناٹ آؤٹ 35 رن بناکر اپنی جگہ یقینی کرلی تھی۔ اس طرح سڈنی میں تیسرے ٹسٹ میںایک اور نئی اوپننگ جوڑی اترے گی۔ ایڈیلیڈ ک پہلے ٹسٹ میں پرتھوی شا اور مینک اگروال اترے تھے۔

پرتھوی کو ایڈیلیٹ ٹسٹ میں صفر اور چار رن بنانے کے بعد دوسرے ٹسٹ سے باہر کردیا گیا تھا۔ دوسرے ٹسٹ میں مینک اور شبھمن گل کی جوڑی اتری تھی۔ مینک نے اب تک چار اننگز میں 17، 9 ، صفر اور پانچ کے اسکور کئے جس کے بعد ان کا تیسرے ٹسٹ سے باہر ہونا طے ہے۔

ہندوستانی ٹسٹ ٹیم اس طرح ہے:

اجنکیا رہانے (کپتان)، روہت شرما (نائب کپتان)، مینک اگروال، پرتھوی شا، لوکیش راہل، چتیشور پجارا، ہنوما وہاری، شبھمن گل، ردھیمان ساہا (وکٹ کیپر)، رشبھ پنت (وکٹ کیپر)، جسپریت بمراہ، نو دیپ سینی، کلدیپ یادو، رویندر جڈیجہ، روی چندرن اشون، محمد سراج، شاردل ٹھاکر اور ٹی نٹراجن۔