شاہ رخ خان نے اپنے مداحوں کو سنائی خوش خبری، ویڈیو کلپ پوسٹ کر کے کہا- ’2021 میں پردے پر ملتے ہیں‘

3 منٹ 15 سیکنڈ کی ویڈیو میں شاہ رخ خان نے اپنے مدحوں کو نئے سال کی مبارکباد پیش کرتے ہوئے یہ کہا کہ ان کی یہ پوسٹ دیر سے تیار ہو پائی ہے۔ انہوں نے پوسٹ میں اپنی آنے والی فلم ’پٹھان‘ کا ذکر کیا ہے۔

تصویر بشکریہ ٹوئٹر / ویڈیو گریب
تصویر بشکریہ ٹوئٹر / ویڈیو گریب
user

قومی آوازبیورو

ممبئی: نئے سال کے موقع پر بالی ووڈ کے سپر اسٹار شاہ رخ خان نے اپنے مداحوں کو خوشخبری دیتے ہوئے کہا ہے کہ وہ 2021 میں پردہ سیمیں پر نظر آنے والے ہیں۔ کنگ خان نے نئے سال کے موقع پر ہفتہ کے روز خود ویڈیو بنا کر پوسٹ کی ہے۔ شاہ رخ نے اپنی پوسٹ میں لکھا کہ وہ اب 2021 میں بڑے پردے پر نظر آئیں گے۔

شاہ رخ نے پوسٹ میں اپنی آنے والی فلم ’پٹھان‘ کا بھی ذکر کیا ہے۔ 3 منٹ 15 سیکنڈ کی ویڈیو میں شاہ رخ خان نے اپنے مدحوں کو نئے سال کی مبارکباد بھی پیش کی ہے اور یہ بھی کہا کہ ان کی یہ پوسٹ دیر سے تیار ہو پائی، کیونکہ انہوں نے کلپ کو خود ہی شوٹ کیا اور ایڈٹ بھی کی ہے۔

شاہ رخ خان نے ویڈیو کے شروعات میں کہا، ’’یہ سال کا وہ وہ وقت ہے جب پرانا سال ختم ہو رہا ہے اور نیا سال دستک دے رہا ہے۔ دراصل نیا سال آ چکا ہے لیکن آپ سبھی کو مبارک باد پیش کرنے میں مجھے دیر ہو گئی۔ مجھے یقین ہے کہ 2020 ہر کسی کے لئے سب سے خراب سال رہا ہے۔ خراب وقت میں بہتوں کے لئے امید اور روشنی کی کرن کھوجنا مشکل ہے۔ لیکن میں برے دنوں، مشکل وقت اور بھیانک سالوں کو ایک خاص نظریہ سے دیکھتا ہوں۔‘‘

انہوں نے مزید کہا، ’’میرا خیال ہے کہ جب کوئی اپنی زندگی کے سب سے نچلی سطح پر ہوتا ہے تو اچھی بات یہ ہے کہ آگے بڑھنے کا صرف ایک ہی طریقہ ہے کہ اوپر کی طرف، بہتری کی جانب پیش قدمی کی جائے۔ 2020 جیسا بھی رہا ہو لیکن 2021 ضرور عظیم، بہتر، شاندار اور انتہائی خوبصورت گزرنے والا ہے۔‘‘

شاہ رخ خان نے اس ویڈیو کلپ کو دلچسپ بنانے کے لئے نہ صرف اسپیشل افیکٹس ڈالے بلکہ ہلکا پھلکا مذاق بھی کیا۔ انہوں نے کہا کہ 2020 نے ہمیں ایک چیز سکھائی ہے وہ یہ کہ اصل مزہ اصلی لوگوں کے ساتھ ہے۔ آپ سبھی کے لئے 2021 میں ڈھیر ساری خوشیاں، لطف اور سکون کی تمنا کرتا ہوں۔

مزاحیہ انداز میں انہوں نے کہا، ’’کیا میں کسی سستے گریٹنگ کارڈ کی طرح نظر آ رہا ہوں؟ تو میں اس میں میوزک اور ٹیکسٹ ڈال کر اسے دلچسپ بنا دیتا ہوں۔ جائیے ہارڈ پارٹی کیجیے لیکن ہارڈ نہیں بلکہ سوفٹ طریقہ سے۔ زیادہ ڈرنک مت کرنا اور اپنے کپڑے اتار کر سڑک پر مت دوڑنا کیونکہ اس میں گرفتار ہونے کا خطرہ ہے اور صبح جب آپ اٹھیں گے تو معلوم ہو گا کہ آپ کا موبائل کھو چکا ہے۔‘‘

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


next